A u koordinua Hungaria me Rusinë kundër Ukrainës dhe BE-së? Dalin bisedat mes ministrave të jashtëm, Lavrov dhe Szijjártó

Një seri përgjimesh telefonike mes ministrit të Jashtëm rus Sergei Lavrov dhe homologut të tij hungarez Peter Szijjártó ka nxjerrë në pah dyshime të forta për bashkëpunim të ngushtë mes Budapestit dhe Moskës, me qëllim bllokimin e Ukrainës në rrugën e saj drejt Bashkimit Evropian.

Sipas një investimi të publikuar nga bashkëpunimi mes disa mediave ndërkombëtare (FRONTSTORY.PL, Delfi Estonia, The Insider dhe Qendrën Hetimore të Ján Kuciak), Hungaria ka luajtur rol kyç në pengimin e ndihmës financiare për Ukrainën dhe në vonimin e negociatave të anëtarësimit të saj në BE.

Ngjarjet lidhen me mbledhjen e Këshillit të Europës në Bruksel më 14 dhjetor 2023, ku liderët e BE-së diskutuan hapjen e negociatave me Ukrainën dhe Moldavinë.

Kryeministri hungarez Viktor Orbán kishte kërcënuar me veto, duke përdorur çështjen si presion ndaj Brukselit për fondet e ngrira ndaj Hungarisë.

Megjithatë, në një manovër diplomatike, Orbán u largua nga salla gjatë votimit, duke i hapur rrugë miratimit unanim nga 26 vendet e tjera, ndërsa Hungaria abstenoi.

Përgjimet tregojnë gjithashtu se Szijjártó ka informuar vazhdimisht Lavrovin për zhvillimet e brendshme në BE dhe për qëndrimet e vendeve perëndimore ndaj Rusisë, duke ngritur shqetësime për rrjedhje informacioni të ndjeshëm.

Një nga bisedat:

S. Lavrov: Shiko, doja gjithashtu të të telefonoja për të verifikuar kompromisin që arritët me Bashkimin Evropian mbi hapjen e negociatave për anëtarësimin e Ukrainës. Dhe kishte raporte se roli vendimtar u luajt nga gjuha e pakicave kombëtare.

P.Szijjártó: Absolutisht. Ashtu ishte.

S. Lavrov: Ne po përpiqemi të sigurojmë dokumentin e saktë, por…

P.Szijjártó: Do ta dërgoj unë. Nuk është problem.

(…)

S. Lavrov: Mirë, Peter, nëse mund të ma dërgosh dokumentin, do ta vlerësoja.

P.Szijjártó: E bëj menjëherë. Do ta dërgoj në ambasadën time në Moskë, dhe ambasadori im do ta përcjellë tek shefi yt i kabinetit, dhe pastaj është në dispozicionin tuaj.

Në një tjetër episod, gjatë korrikut 2024, Szijjártó kontaktoi Lavrovin për të koordinuar një takim mes Orbán-it dhe presidentit rus Vladimir Putin, menjëherë pas një vizite të këtij të fundit në Kiev me presidentin ukrainas Volodymyr Zelensky.

Takimi me Putin-in u mbajt në fshehtësi nga aleatët e Hungarisë në BE dhe NATO, duke shkaktuar reagime të forta në Bruksel.

Këto biseda dalin në sipërfaqe në një moment delikat për qeverinë e Orbán-it, ndërsa Hungaria përgatitet për zgjedhje parlamentare dhe partia në pushtet po përballet me një rënie në sondazhe përballë opozitës së udhëhequr nga Péter Magyar.