Ish-kryeministri bullgar: Asnjë shans që Bullgaria të heqë veton gjatë samitit

Ish-Kryeministri bullgar Kiril Petkov, qeveria e të cilit ra ditën e djeshme, tha të enjten (23 qershor) se nuk kishte asnjë shans që Bullgaria të hiqte veton ndaj Maqedonisë së Veriut gjatë këtij samiti të BE-së, por la të kuptohet se një zgjidhje mund të jetë e afërt në ditët në vijim.

Petkov, i qëndron qasjes së tij se parlamenti duhet të miratojë një rezolutë që lejon heqjen e vetos, bazuar në miratimin e propozimit të Presidencës franceze.

Ai theksoi se opozita bullgare përdori çështjen maqedonase për të shantazhuar kabinetin e tij sa herë që kishin frikë se do të zbulohej korrupsioni që nga koha e tyre në detyrë.

Një votë mosbesimi çoi në rrëzimin e qeverisë së Kiril Petkov, e cila u zgjodh vetëm gjashtë muaj më parë.

Situata e tensionuar politike në parlamentin bullgar pas votimit të mosbesimit të miratuar dje nuk ndihmon për një zgjidhje të shpejtë të problemit të vetos.

Asnjë parti politike nuk dëshiron të marrë përgjegjësinë për një vendim që mund të kritikohet nga opinioni publik, veçanërisht me zgjedhjet në prag.

Partia kryesore e opozitës, GERB e Borisovit, thotë se do të mbështesë një rezolutë për heqjen e vetos nëse Petkov e propozon atë.

I pyetur nga EURACTIV për Borisovin, i cili po përpiqet të pozicionohet si një politikan konstruktiv, Petkov tha:

“Ai është personi më i pandershëm që njoh. Ai thotë në mëngjes, ‘Unë dua të mbështes hyrjen e Maqedonisë së Veriut në BE’… Në të njëjtën kohë, ai bllokon komisionin e punëve të jashtme në parlament të njëjtën pasdite.”