Festë me gol pas Kombëtares, Manaj dhe Asani gjejnë rrugën e rrjetës

Grumbullimi me Kombëtaren shqiptare, duket se ka motivuar sulmuesit kuqezi.

Rey Manaj, ka gjetur sërish rrugën e rrjetës, pak ditë pas golit historik ndaj Serbisë, ku i dha fitoren minimale Shqipërisë.

Pas një pasimi në marrë në zonë, shqiptari lëshoi një gjuajtje të fortë me të majtën dhe e ndali topin në fundin e rrjetës.

Për Manajn ky është goli i parë në kampionat, në pesë ndeshje të luajtura. Ai ka shënuar edhe katër gola të tjerë me fanellën e Al Sharjah, në Kupë dhe Ligën e Kampioneve të Azisë.

Shifrat tregojnë se Manaj është përshtatur shumë mirë me skuadrën e re, me të cilën u bashkua në fund të merkatos së verës, pas largimit nga turqit e Sivasspor.

Rrugën e rrjetës e ka gjetur edhe Jasir Asani. Sulmuesi kuqezi i dha avantazhit skuadrës së Esteghlal, në kampionatin iranian ndaj Mes Rafsanjan.

Në minutën e 11-të, Asani me një gjuajtje të bukur në zonë, e dërgoi topin në fund të rrjetës, duke i dhënë avantazhin dhe festën ekipit të tij në shtëpi.

Për 30-vjeçarin, ky është goli i tretë në gjashtë ndeshjet e kampionatit iranian, aty ku u transferua nga skuadra e Gwangju.