Bindet Asllani, shumë pranë Besiktasit

Besiktasit duket se është destinacioni përfundimtar për Kristjan Asllanin. Pavarësisht se pak ditë më parë u raportua nga mediat italiane se mesfushori kuqezi kishte refuzuar skuadrën turke, këtë herë eksperti i merkatos, Gianluca Di Marzio, shpjegon se bisedimet janë në drejtimin e duhur dhe pranë finalizimit të marrëveshjes.

Sipas tij, Asllani ka dhënë miratimin dhe të gjitha palët e përfshira, si skuadra e Torinos ashtu edhe ajo e Interit, janë thjesht duke kryer detajet e fundit burokratike përpara zyrtarizimit të transferimit të tij.

23-vjeçari do të kërkojë ringritjen pas një periudhe të vështirë, ku nuk është aktivizuar, në një kampionat ku mund të gjejë më shumë hapësira dhe të ketë rol protagonisti.

Besiktasit për momentin ndodhet tre pikë larg zonës evropiane, por 15 pikë larg kryesuesve të Galatasarayt në kampionatin turk.

Në rast se nuk do të ketë surpriza të tjera, Asllani pritet të udhëtojë drejt Turqisë në orët e ardhshme për të hedhur firmën në kontratë.