Sot është dita më e trishtë e vitit

E hëna blu  i referohet “të hënës më të trishtuar” dhe konsiderohet nga disa si dita më dëshpëruese e vitit. Zakonisht ndodh të hënën e dytë ose të tretë të janarit, teksa për këtë vit, 20 janari është caktuar si “E Hëna Blu”.

Pavarësisht origjinës së saj të diskutueshme, e hëna blu vë theksin te rëndësia e shëndetit mendor, duke ngjallur biseda rreth depresionit apo mirëqenies, veçanërisht në janar, një muaj që shumë e përjetojnë si sfidues.

Si lindi e hëna blu

Termi u krijua në vitin 2005 nga psikologu britanik, Cliff Arnall si pjesë e një fushate marketingu për një agjenci udhëtimi. Por, kjo ide u përmend për herë të parë në një deklaratë për shtyp të vitit 2005 nga kompania britanike “Sky Travel”, e cila pretendonte se kishte llogaritur datën duke përdorur një “ekuacion”.

Formula e Arnal përfshin gjashtë faktorë, si moti (W), të ardhurat (D), borxhi (d), koha që nga Krishtlindjet (T), koha që nga dështimi për të përmbushur qëllimet e Vitit të Ri (Q), nivelet e ulëta të motivimit (M) dhe nevoja për veprim (Na).

Megjithatë duke lënë teoritë dhe truket e marketingut mënjanë, e hëna blu është një ditë si çdo ditë tjetër e vitit, e cila mund të jetë e zymtë për disa, më e zymtë për të tjerët dhe aspak e zymtë për ca të tjerë. Janari, gjithsesi, është një muaj i gjatë e i mërzitshëm deri diku për të gjithë.

“E hëna blu” është një ditë që mund të krijojë një ndjenjë reflektimi ose boshllëku, duke përforcuar ndjenjat e trishtimit ose mungesës nëse jeni në një periudhë të vështirë.

Nëse ndiheni të trishtuar gjatë kësaj periudhe, zgjidhni të bëni gjërat tuaja të preferuara, si kujdesi ndaj vetes ose kërkoni mbështetje nga të afërmit.