MELONI përfshin Shqipërinë në DITARIN javor: E mendoni dot se sheshi ku u zhvillua samiti quhej “Sheshi Italia”!

Kryeministrja e Italisë, Giorgia Meloni ka qenë e surprizuar nga Samiti i Ballkanit Perëndimor që u mbajt në Tiranë në datën 6 dhjetor dhe këtë pjesë, bashkë me videon përkatëse të takimit të saj në hyrje me kryeministrin mikpritës Edi Rama e ka përfshirë në ditarin javor të punës së saj, me video, një ditar që kryeministrja italiane e ka bërë praktikë për qytetarët italianë.

Meloni thotë se u entuziazmua kur mësoi se sheshi ku do të mbahej Samiti quhet Sheshi Italia, ndërkohë që stadiumi “Air Albania” është projektuar nga studio arkitekturore italiane. Dhe që këtu, Meloni thotë sesa e rëndësishme është Italia nëpër botë.

“Ishte një javë me takime ndërkombëtare. Dreka në Palazzo Kixhi me mbretin e Jordanisë. Takimi në Tiranë i BE me vendet e Ballkanit Perëndimor, me të cilët historikisht Italia ka një raport të privilegjuar. Mendoni që Samiti mbahej në një shesh që mban emrin “Sheshi Italia”; dhe stadiumi ku mbahej ky samit, është projektuar nga një arkitekt italian.

Sa më shumë udhëtoj nëpër botë, dhe aq më shumë kuptoj sesa shumë dëshirë ka për Italinë. Dhe për ato vende ku ekselentët tanë shihen në mënyrë shumë pozitive. Një element mbi të cilin duhet të arsyetojmë dhe të vlerësojmë më shumë prezencën tonë si komb në raportet ndërkombëtare” thotë kryeministrja Giorgia Meloni.

Samiti i Ballkanit Perëndimor dhe BE për herë të parë zhvillohej jashtë Brukselit. Liderët e BE u mblodhën të gjithë në Tiranë dhe në mbyllje, në një mënyrë krejt origjinale, përvec fotos familjare, patën mundësi të shohin dhe një copëz spektakli tradicional vallesh e këngësh nga Shqipëria.