Ekonomia shqiptare me ecuri pozitive, ministrja Ibrahimaj: Rritja më e lartë në rajon, kyçe bujqësia dhe ndërtimi! Bastet do hapen deri në mars

Ministrja Delina Ibrahimaj është shprehur sot se ekonomia shqiptare ka shënuar një ecuri pozitive dhe ka pasur rritjen më të lartë në rajon. Shefja e financave shqiptare, në konferencën e përmuajshme mbi treguesit ekonomikë, ka thënë se rol kyç kanë luajtur bujqësia dhe ndërtimi.

Po ashtu, ministrja e Financave ka thënë se në tremujorin e tretë shifrat kanë treguar një rritje me 4%, të cilën Ibrahimaj e quajti reale dhe të zhveshur nga ndryshimi i çmimeve për shkak të inflacionit.

“Në tërësi viti ka qenë vit i cili ka shfaqur ecuri pozitive ekonomikë. Këtë e tregojnë edhe shifrat e INSTAT, për tre mujorin e tretë shifrat ekonomike tregojnë se rritja ishte 4.02%. Këto janë rritje reale të ekonomisë të zhveshura nga ndryshimet çmimeve. Rritja vijon të mbetet në nivelin 3.4% sa i përket krahasimit me vendet e rajonit.

Tremujori i tretë është shfaqur me 4% dhe ka qenë rritja më e lartë në rajon. Ka pasur një ngadalësim të rritjes në të gjitha vendet e rajonit. Sa i takon analizës sipas sektorëve rritja ka qenë e shpërndarë në të gjithë sektorët.

Rritje ka pasur bujqësia dhe blegtoria, edhe ndërtimi 10.66%. edhe tregtia më shumicë ka pasur ecuri pozitive, industria ka shënuar rënie dhe kontribut negativ në rritje. Në këtë kontribut ka ndikuar industria nxjerrëse. Industria përpunuese, fasonët apo prodhimet e drurit kanë kontribuar me rritje në këtë sektori. Sa i përket metodës së shpenzimeve, konsumi final i popullatës ka qenë me rritje pozitive, me 8.09%”, u shpreh Delia Ibrahimaj, ministre e Financave.

Më tej, ajo u shpreh se me nisjen e vitit 2023 do të nisin dhe procedurat e miratimit të ligjit për bastet sportive online.

“Ne kemi punuar intensivisht gjatë muajve të fundit me qëllim finalizimin e ndryshimeve ligjore në ligjin për lojërat e fatit. Me qëllim lejimin e basteve sportive online duke pasur shumë kujdes të ruajmë ato kritere e parametra që kanë qenë të përcaktuara. Jemi në proces te finalizimit. Me nisjen e vitit të ri 2023, do nisim procedurat e miratimit të këtij ligji. Ne gjykimin tim, brenda 3 mujorit të parë të vitit 2023 ky ligj pritet të miratohet në parlament”, përmbylli ministrja Ibrahimaj.