Adoleshentja që vuan nga alergjia ndaj ujit

Jeta e një adoleshenteje mori një kthesë të papritur në vitin 2021 pas gati një viti vizitash te mjekët. 14-vjeçarja Sadie Tessmer u diagnostikua me urtikari hidrogjenike, e njohur zakonisht si një alergji ndaj ujit. Ajo vinte re se diçka e çuditshme ndodhte sa herë bënte dush.

Lëkura bëhej e kuqe por nëna e saj mendonte se uji ishte shumë i nxehtë. Dhe çdo kontakt me ujin, qoftë edhe me lotët e saj, i shkakton dhimbje të padurueshme. Pas një vizite te dermatologu, ajo u diagnostikua me alergjinë që besohet se prek vetëm 50 deri në 100 njerëz në botë.

“Ndjeva sikur dikush po më hidhte benzinë ​​dhe po më vinte flakën. Skuqesha dhe ndihesha sikur po digjesha sa herë që bëj dush, laja duart ose djersitesha. Nuk e duroj dot çdo gjë që po ndodh, filloj të qaj dhe kjo e bën edhe më keq situatën time sepse jam alergjike ndaj lotëve të mi”, tha ajo.

Deri në mesin e vitit 2021, Sadie nuk kishte probleme me ujin dhe i pëlqente të notonte. Më pas befas, në fund të vitit 2021, ajo filloi të vërejë se i digjte lëkura në të gjithë trupin pasi bëri dush dhe u la në një gjendje konfuzioni.