Viti i ri shkollor, Kushi: Regjistrimi në klasë të parë edhe për fëmijët që nuk i kanë mbushur 6 vjeç

Fëmijët të cilët i mbushin 6 vjeç deri më 31 dhjetor, do të mund të regjistrohen në klasë të parë për vitin e ri shkollor 2023 – 2024. Kështu ka bërë me dije Ministrja e Arsimit, Evis Kushi, ndërsa vendimi është marrë me ndryshimet e miratuara në Ligjin për Arsimin Parauniversitar.

Në një postim në Facebook, Kushi shkruan se të gjithë prindërit që i shohin fëmijët e tyre me zhvillimin dhe përgatitjen e duhur, edhe pse nuk i kanë mbushur 6 vjeç, mund t’i regjistrojnë në klasë të parë. Ata duhet të aplikojnë në sistemin e-Albania nga data 21 gusht deri më 1 shtator.

Ministrja thekson se ky afat vlen edhe për të gjithë ata prindër që nuk kanë arritur të bëjnë gjatë fazës së parë regjistrimet për fëmijët e tyre në klasën e parë dhe të dhjetë.

“Me ndryshimet që miratuam në Ligjin për Arsimin Parauniversitar, edhe vogëlushët që mbushin deri në datën 31 dhjetor do të kenë mundësi të  regjistrohen në klasë të parë për vitin e ri shkollor 2023 – 2024. Të gjithë prindërit që mendojnë se fëmijët e tyre, edhe pse ende nuk i kanë mbushur 6 vjeç e kanë tashmë zhvillimin dhe përgatitjen e duhur, si dhe kanë dëshirë t’i regjistrojnë ata në klasë të parë, janë të ftuar të aplikojnë në sistemin e-Albania nga data 21 gusht deri më 1 shtator. Ky afat vlen edhe për të gjithë ata prindër që nuk kanë arritur dot të bëjnë gjatë fazës së parë regjistrimet për fëmijët e tyre në klasën e parë dhe të dhjetë”, shkruan Kushi.