The Telegraph: Shqipëria, ndër vendet më të mira në Ballkan për t’u vizituar

Ballkani i njohur për konfliktet brutale, dekadat e fundit është kthyer në një mundësi udhëtimi. Britanikja “The Telegraph” thotë se vetëm vitin e fundit mbi 4 milionë turistë britanikë e kanë vizituar këtë rajon.

Ndër vendet e Ballkanit, shkrimi përshkruan edhe Shqipërinë, të cilësuar dikur si një djerrinë neo-staliniste e betonit postkomunist, Shqipëria ka lulëzuar në dekadën e fundit për sa i përket imazhit të saj.

Në artikull theksohet se atje ku shkëlqen, Shqipëria shkëlqen shumë. Vlora shënon pikën ku bashkohen Adriatiku dhe Joni, ngjitur me Gadishullin e Karaburunit.

Përpos bregdetit, në shkrim përmendet edhe kultura dhe historia.

“Shkoni në brendësi të vendit dhe shpalosni një ëndërr piktoreske, vende të lashta historike si Butrinti, Bylisi dhe Apolonia; qytetet e mrekullueshme osmane si Gjirokastra dhe Berati dhe Parku Kombëtar i Llogarasë, i cili strehon një tjetër lloj lartësie shqiptare nën maskën e maleve të larta”.