Suedia në NATO/ Presidenti i Hungarisë nënshkruan projektligjin që miraton pranimin e shtetit nordik në aleancë

Presidenti i Hungarisë, Tamas Sulyok ka nënshkruar projektligjin që miraton pranimin e Suedisë në aleancën ushtarake të NATO-s, sipas një deklarate të martën nga zyra e presidentit.

Ligjvënësit miratuan pranimin e Suedisë në NATO më 26 shkurt, duke hequr pengesën e fundit përpara hapit historik të vendit nordik, neutraliteti i të cilit zgjati gjatë dy luftërave botërore dhe Luftës së Ftohtë, shkruajnë mediat e huaja.

Stokholmi braktisi politikën e tij të mos-angazhimit për një siguri më të madhe brenda Organizatës së Traktatit të Atlantikut të Veriut pas pushtimit të Ukrainës nga Rusia në vitin 2022.

Votimi hungarez i dha fund vonesave për të përfunduar ndryshimin e politikës së sigurisë dhe pasoi një vizitë të kryeministrit suedez, Ulf Kristersson gjatë së cilës të dy vendet nënshkruan një marrëveshje armësh.

Kryetari i parlamentit nënshkroi ratifikimin dhe ia përcolli legjislacionin zyrës së presidentit për shpallje javën e kaluar.

Formalitetet e mbetura, të tilla si depozitimi i dokumentacionit të pranimit në Uashington, ka të ngjarë të përfundojnë së shpejti.