Shembet tribuna e garës së demave në Kolumbi, presidenti: Të ndalohen evente të tilla

Të paktën katër njerëz kanë vdekur dhe qindra të tjerë janë plagosur pas shembjes së një tribune gjatë një gare me dema në qendër të Kolumbisë, kanë raportuar mediat lokale.

Në disa pamje është parë momenti kur ka rënë tribuna prej druri me plot spektatorë në një stadium në komunën El Espinal.

Të vdekurit përfshijnë dy gra, një burrë dhe një fëmijë, tha guvernatori i Tolima, Jose Ricardo Orozco. Zyrtari shëndetësor i rajonit tha se spitalet kishin trajtuar 322 persona nga të cilët katër ishin në kujdes intensiv.

Ky incident ka ndodhur gjatë një organizimi tradicional, në të cilin pjesëtarët e publikut inkurajohen të përfshihen në ring për të angazhuar demat. Ka shqetësime se numri i viktimave do të rritet.

Presidenti në largim Ivan Duque tha se do të kishte një hetim, ndërsa presidenti i zgjedhur Gustavo Petro u kërkoi zyrtarëve vendas të ndalonin ngjarje të tilla.