Seleksionimi i FSHF-së me futbollistët e rinj në SHBA dhe Kanada, afati i fundit i regjistrimit data 30 prill

Edhe pak ditë ka mbetur nga përfundimi i afatit të regjistrimit për seleksionimin që do të organizojë FSHF me futbollistët e rinj shqiptarë, të cilët jetojnë në Shtetet e Bashkuara të Amerikës dhe Kanada.

Seleksionimi do të zhvillohet në datat 18 dhe 19 maj 2024 në kompleksin “Hudson Sports Complex, Warwick NY” dhe do të jetë i fokusuar te lojtarët e vitlindjeve 2009-2010-2011, ndërsa është i hapur edhe për futbollistet vajza pa kufizime moshe.

Këtë seleksionim do ta ndjekë nga afër edhe Drejtori Teknik i FSHF-së, Fulvio Pea, i cili përveç përzgjedhjes së talenteve të rinj, do të shikojë nga afër edhe ecurinë e lojtarëve që spikatën në seleksionimin e vitit të kaluar të organizuar nga FSHF.

Për këtë arsye, Departamenti i ekipeve Kombëtare më datë 19 maj do të organizojë edhe një ndeshje miqësore me lojtarët e vitlindjes 2007-2008 që kanë spikatur në seleksionimin e kaluar.

Afati i regjistrimit për të marrë pjesë në seleksionim është i hapur deri në fundin e muajit prill dhe FSHF dëshiron t’i bëj thirrje të gjithë të interesuarve që të nxitojnë të regjistrohen.