Rama: 3 stadiume të reja nisin me 3 konkurse ndërkombëtare brenda pranverës, në Durrës, Vlorë dhe Korçë

3 stadiume të reja nisin me 3 konkurse ndërkombëtare brenda pranverës, në Durrës, Vlorë dhe Korçë.

Lajmin e ka bërë të ditur Kryeministri Rama përmes një postimi në Facebook gjatë mbledhjes që po zhvillon me ministrat.

Në këtë takim, Performanca 12-mujore e kabinetit  të tij qeveritar është sërish në fokus.

Përmes një postimi në rrjetet sociale,  Rama shkruan se analiza e vitit të shkuar i bën më optimistë për vitin 2023 dhe se i jep atij dhe kabinetit qeveritar mundësinë e një reflektimi shumë të dobishëm mbi çdo sektor.

Në fotografitë e publikuara nga kreu i qeverisë duket se në fokus të qeverisë edhe për këtë vit mbeten projekte si;  Korridori Blu, Parku Fotovoltaik në Karavasta, HEC-I i Skavicës, Tuneli i Llogarasë, Hekurudha Tiranë-Durrës, Aeroporti i Sarandës, Aeroporti i Vlorës dhe fluksi i turistëve.

Sakaq, në një tjetër postim, duke iu kundërpërgjigjur kritikëve, Kryeministri Rama shkruan se në vitin 2022 është arritur objektivi për gjysmë milliardë Dollarë eksporte bujqësore.