Punonjësi i muzeut vidhte pikturat origjinale dhe i shiste ato sepse i pëlqente jeta luksoze

Një punonjës i një muzeu në Gjermani ndërroi një pikturë me një të rreme dhe më pas shiti veprën origjinale për të blerë mallra luksi, duke përfshirë një Rolls Royce dhe orë dore të shtrenjta, sipas një gjykate në Mynih.

30-vjeçari, i cili mbetet i paidentifikuar për shkak të ligjeve strikte të privatësisë në Gjermani, u dënua gjithashtu për vjedhjen e tre veprave të tjera të artit. Ai nuk u dënua me burg, por me 21 muaj detyrim paraqitjeje dhe u urdhërua t’i kthente muzeut më shumë se 60,600 euro.

Në një deklaratë për shtyp, Gjykata e Qarkut të Mynihut tha se dënimi mori parasysh faktin se burri kishte pranuar dhe treguar “pendesë të vërtetë”.

Burri, i cili ishte punonjës i Muzeut Deutsches në Mynih, punoi si menazher nga maji i vitit 2016 deri në prill 2018.

Gjatë asaj kohe, ai vodhi “Përralla e Princit Bretkosë” nga nga Franz von Stuck, e zëvendësoi atë me një pikturë të rreme dhe e nxori origjinalin në ankand. Ai gënjeu në ankand duke thënë se piktura dikur i përkiste gjyshërve ose stërgjyshërve të tij. Më vonë u shit në një galeri zvicerane për 70,000 euro, nga të cilat ai mori 50,000 euro.

Ai vodhi gjithashtu tre piktura të tjera dhe shiti me sukses dy prej tyre. Burri i përdori paratë për të shlyer borxhet dhe për të nisur një “mënyrë jetese luksoze”, tha gjykata, duke shtuar: “I pandehuri shfrytëzoi paturpësisht mundësinë për të hyrë në dhomat e magazinimit dhe shiti pasuri të vlefshme kulturore për të siguruar një standard të lartë jetese për veten dhe për t’u dukur.”

Muzeu Deutsches ndërkohë tha për CNN se po përpiqej të merrte pikturat.