Projekti për ndërtimin e “polit qeveritar”, Rama: Akomodohen mbi 20 institucione me 13 mijë punonjës

09/01/2025

Kryeministri Edi Rama zhvilloi sot një takim me përfaqësues të sipërmarrjes dhe sektorit bankar, ku u prezantuan projektet e para të zhvillimit të pronave publike shqiptare nga sipërmarrjet private përmes konkurseve ndërkombëtare.

Në një projektet e prezantuara ishte edhe ndërtimi i polit qeveritar ku do të akomodohen mbi 20 institucione, në të cilat do të punojnë mbi 13 mijë punonjës. Gjatë fjalës së tij, Kryeministri Rama është shprehur se shteti do të jetë partner i pronarëve privatë, të cilëve ju bëri thirrje që të prezantojnë idetë e tyre.

Edi Rama: Të gjithë duhet të ndiheni të lirë dhe të mirë se ardhur në dyert e Korporatës Shqiptare të Investimeve dhe për propozime që nuk janë në listën e shpallur prej nesh, qoftë në kryeqytet dhe në çdo pjesë tjetër të vendit, ku sipas idesë përkatëse mund të ketë interes për të hyrë në një bashkëpunim me shtetin dhe ku shteti do të jetë i prirur të jetë partner në investim dhe gjithmonë më pak i gatshëm që të dorëzojë prona për zhvillim me ato kushte që janë të përshkruara në legjislacion dhe që kanë shërbyer për një periudhë kohe që e konsiderojmë të tejkaluar. Sot jemi në kushtet kur edhe për zhvillime të kësaj natyre në qytet, kemi të gjithë arsyet të mendojmë që jo vetëm sipërmarrësit vendas që janë baza e këtij partneriteti, por edhe sipërmarrës dhe fonde të huaja kanë shprehur interes. As të mos kërkojmë diçka që del jashtë parametrave mesatarë të tregut, por as të mos bëjmë atë që është bërë në të kaluarën që thjesht të lëshojmë territor.

Shteti do të jetë një partner i njëjtë i të gjithë partnerëve të pafundëm që janë si pronarë privat, por shumë më i thjeshtë pasi është një dhe ndërkohë me kushte dhe me kërkesa shumë të qarta. Ndërtimi i bibliotekës kombëtare, ndërtimi i polit qeveritar ku do të akomodohen mbi 20 institucione dhe do të punojnë aty brenda mbi 13 mijë punonjës, janë vepra që mund të bëhen vetëm në këtë mënyrë sot për sot dhe do të na kursejnë jashtëzakonisht ne, shumë shpenzime për qira. Do ta na japin mundësi që të zhvillojmë territore. Për stadiumin Selman Stërmasi nuk ka asnjë iluzion që është rruga e duhur. Përsa i përket parkimeve, ne po shohim rezultat domethënës në iniciativat e bashkisë për parkimet publike me partneritet. Edhe këtu, të gjithë duhet të ndihen të mirëpritur që për çdo ide për t’u futur në bashkëpunim me shtetin, ta paraqesin. Prokurimet publike po kalojnë në duart e një operatori kombëtar dhe do të kenë së shpejti vitin e ardhshëm inteligjencën artificiale për t’i bërë shumë transparente.

Written by: Sasha Ndreka