“Po lindin fëmijë dixhitalë”,deklarata shokuese e Tim Cook!

Pavarësisht se drejton një nga kompanitë më të rëndësishme të teknologjisë në botë, CEO i “Apple”, Tim Cook, nuk dëshiron t’i shohë fëmijët ‘të ngjitur’ pas produkteve të kompanisë.

“Fëmijët po lindin dixhitalë, tani janë fëmijë dixhitalë”, citohet të ketë thënë Cook në një profil të gjatë të tij të publikuar në revistën “GQ” së fundi. “Mendoj se është shumë e rëndësishme që të vendosen disa kufizime të forta”.

Në profilin e “GQ”, Cook sugjeroi se “Apple” nuk funksionon nga nxitja e varësisë dixhitale.

“Ne nuk duam që njerëzit të përdorin shumë telefonat tanë. Ne nuk jemi të stimuluar për këtë. Ne nuk e duam këtë. Ne ofrojmë mjete që njerëzit të mos e bëjnë këtë”, tha Cook.

Në vend të kësaj, ai tha se kompania është e përqendruar në ndërtimin e produkteve që fuqizojnë njerëzit të bëjnë, të mësojnë apo edhe të krijojnë gjëra që përndryshe nuk mund t’i bënin.