Parashikimi për Britaninë: Në janar, fatura e energjisë mund t’i tejkalojë 4 mijë paund

Ditë të vështira e presin Britaninë e Madhe. Sipas një parashikimi të zymtë të kompanisë analitike, Cornwall Insight, faturat e energjisë për një familje mesatare mund të arrijnë në 3582 paund në vit nga muaji tetor, nga 1971 që është sot, për t’u rritur më tej gjatë muajve në vazhdim, duke prekur vlerat e 4400 paundëve në prill të vitit të ardhshëm.

Çmimi i energjisë ka arritur majat muajt e fundit për shkak të rritjes së kostos së gazit natyror, pjesërisht si pasojë e luftës në Ukrainë. Kosto e jetesës janë kthyer në çështjen kyçe të garës për lidershipin konservator. Kandidati për kreun e partisë dhe kryeministër, Rishi Sunak është zotuar të ofrojë mbështetje direkte për familjet për t’i ndihmuar të kalojnë atë që e quan dimër ekstremisht të vështire. Sakaq, rivalja e tij Liz Truss deri më tani i ka rezistuar premtimeve të ngjashme, por ka thënë se do të përqendrohet tek ulja e taksave.