OKB pezullon Rusinë nga Këshilli për të Drejtat e Njeriut

Asambleja e Përgjithshme e Kombeve të Bashkuara ka pezulluar këtë pasdite të së enjtes Rusinë nga Këshilli i saj për të Drejtat e Njeriut për shkak të shkeljeve të rënda dhe sistematike e abuzimeve të njerëzve, që pas pushtimit të Ukrainës.

Vendimi u votua nga 93 vende pro, ndërsa 24 vende votuan kundër dhe 58 vende abstenuan. Një shumicë prej dy të tretash të anëtarëve me votim, duke përjashtuar abstenimet, ishte e nevojshme për të pezulluar Rusinë nga këshilli prej 47 anëtarësh.

Votimi pasoi pretendimet se trupat ruse ekzekutuan sistematikisht civilë në Bucha, një qytet në veri-perëndim të kryeqytetit të Ukrainës, Kiev, mes raporteve të tjera për abuzime të të drejtave të njeriut që kur Vladimir Putin urdhëroi pushtimin më 24 shkurt.

Një prej vendeve që ka votuar pro është edhe Shqipëria. Kryeministri, Edi Rama e cilëson votimin “refuzim i fortë për të pranuar shkeljen brutale të çdo lirie e të drejte dhe krimet mizore të luftës në Ukrainë”.

Këshilli i të Drejtave të Njeriut në OKB e ka bazën në Gjenevë të Zvicrës. Vendimet e tij dërgojnë mesazhe të rëndësishme politike dhe mund të autorizojë hetime.