Nën kujdesin e Presidentit Begaj, çelet ekspozita kushtuar Nënë Terezës

Presidenti i Republikës, Bajram Begaj, i shoqëruar edhe nga Presidentja e Republikës së Kosovës, Vjosa Osmani Sadriu, nderuan sot Ditën e Shenjtërimit të Shenjt Terezës, me çeljen e një ekspozite kushtuar figurës së saj, që u hap në ambientet e jashtme të Institucionit të Presidentit.

Në ceremoninë e organizuar me këtë rast, Presidenti Begaj u shpreh:

Sot ne mblidhemi këtu për të nderuar shpirtin e jashtëzakonshëm të një shenjtoreje që e jetoi jetën me dhembshurinë, dashurinë dhe në shërbim ndaj njeriut të pamundur, shenjtores shqiptare, Nënë Terezës. Ndërsa ne qëndrojmë këtu në mesin e kësaj ekspozite që paraqet udhëtimin e jashtëzakonshëm të saj, si dhe në iniciativat e reja për të promovuar madhështinë e figurës së saj, le të marrim një moment për të reflektuar mbi ndikimin thelbësor që ajo pati në botë.

Sipas Kreut të Shtetit, jeta e Nënë Terezës ishte një dëshmi për fuqinë e pakufizuar të mirësisë. Përkushtimi i saj i pandalshëm për të ndihmuar më të dobëtit, shërben si një shembull i potencialit të njerëzimit për të bërë më të mirën.

“Kjo ekspozitë shërben si një kujtim për ndryshimin e madh që një individ i vetëm mund të bëjë kur udhëhiqet nga dashuria dhe një ndjenjë e thellë mirësie. Veprat e Nënë Terezës mes të varfërve dhe të margjinalizuarve, dashuria e saj për të vuajturit dhe përpjekjet e saj të mëdha për t’ju dhënë shpresë atyre në mjerim vazhdojnë të frymëzojnë brezat” – u shpreh më tej Presidenti Begaj.

Në fund të fjalës së tij, Presidenti Begaj nënvizoi se është e rëndësishme që të vazhdohet përpara me trashëgiminë e Nënë Terezës, që përfaqëson vlerat e vetëmohimit, mirësisë dhe të dashurisë në jetë.

Ekspozita është një bashkëpunim midis tri institucioneve: Drejtorisë së Përgjithshme të Arkivave, Agjencisë Shtetërore të Arkivave të Kosovës, si dhe Institutit të Trashëgimisë Kulturore dhe Shpirtërore të Shqiptarëve të Maqedonisë së Veriut.

Ekspozita dokumentare dhe fotografike përmban dokumente të rralla, disa prej të cilave të zbuluara kohët e fundit, mbi jetën dhe veprën e Nënë Terezës.