Ministrat e G20 dështojnë të firmosin deklaratën e përbashkët për luftën në Ukrainë

Kina pranoi të premten se ka “pikëpamje të ndryshme mbi krizën e Ukrainës” midis anëtarëve të G20, por nuk shpjegoi arsyet e saj për mosnënshkrimin e një deklarate të përbashkët pas takimit të ministrave të jashtëm të grupit në Nju Delhi.

G20 është “forumi kryesor për bashkëpunimin ekonomik ndërkombëtar” dhe jo një forum për “zgjidhjen e çështjeve të sigurisë” – siç u ra dakord në samitin e liderëve të G20 në tetor 2022 në Bali – tha zëdhënësi i Ministrisë së Jashtme kineze Mao Ning në një konferencë të rregullt për shtyp.

“Pozicioni i Kinës për çështjen e Ukrainës është i qëndrueshëm… Kina u bën thirrje të gjithë anëtarëve të G20-ës që të fokusohen në rendin kryesor të biznesit dhe të kontribuojnë në promovimin e një rimëkëmbjeje të qëndrueshme, gjithëpërfshirëse dhe ekonomike”, tha Mao.

Të enjten, ministri i jashtëm indian S. Jaishankar njoftoi se takimi i ministrave të jashtëm të G20 nuk ishte në gjendje të arrinte një konsensus për të lëshuar një deklaratë të përbashkët për shkak të “mendimeve të ndryshme” nga palë të ndryshme në lidhje me luftën Rusi-Ukrainë.

Kina është përpjekur të paraqesë veten si një ndërmjetës neutral i paqes në konflikt, ndërsa në të njëjtën kohë ka thelluar partneritetin e saj “pa kufij” me Moskën .