DPA pasurohet me mbi 1 milionë dokumente nga periudha osmane

Drejtoria e Përgjithshme e Arkivave është pasuruar me mbi 1 milionë dokumente mbi Shqipërinë dhe shqiptarët nga arkivat perandorake të Stambollit. Siç bën me dije DPA, dokumentet janë në trajtë dixhitale dhe mbulojnë veprimtarinë politike dhe shoqërore të shqiptarëve përgjatë sundimit osman.

Mes dokumenteve ka vendime dhe dekorime të personaliteteve të ndryshme, informacione mbi përplasjet politike midis prijësve në hapësirën shqiptare, informacione mbi dinastitë e qyteteve shqiptare, të dhëna mbi lëvizjet nacionale shqiptare, greke, serbe dhe dokumente të karakterit religjoz.

“Mbi 1 milionë dokumente të dhuruara, pasurohet fondi i materialeve osmane. Drejtoria e Përgjithshme e Arkivave (DPA) është pasuruar me mbi 1 milionë njësi dokumentare, të përftuara në formën e një dhurimi të radhës prej institucionit homolog, Arkivit të Perandorisë Osmane me qendër në Stamboll.

Dokumentet e marra nën zotërim në trajtë digjitale mbulojnë veprimtarinë politike dhe shoqërore të shqiptarëve përgjatë sundimit osman pesëshekullor. Mes tyre gjenden vendime dhe dekorime të personaliteteve të ndryshme, siç është kërkesa për ngritjen në grada të Mahmut Pashës; informacione mbi përplasjet politike midis prijësve në hapësirën shqiptare, sikurse konflikti mes Ali Pashës dhe Ibrahim Pashës; evidenca mbi mësimin e shqipes në Vlorë dhe në Shkup; informacione mbi dinastitë e qyteteve shqiptare; të dhëna mbi lëvizjet nacionale shqiptare, greke, serbe etj dhe dokumente të karakterit religjoz. Gjithashtu, pjesë e këtyre dokumenteve që i shtohen fondit të materialeve osmane, janë zhvillimet fetare në rajon, si feja Islame, e Krishterë dhe Judaizmi. Në këto dokumente do të gjejmë edhe dinamikat sipas shoqërive përkatëse.

Ky dhurim vjen në vazhdën e përpjekjeve disavjeçare të Arkivit shqiptar dhe të marrëveshjes së bashkëpunimit mes dy institucioneve, për shkëmbimin e dokumenteve arkivore. Më herët, në vitet 2015 dhe 2020, Arkivi i Stambollit ka dhuruar përkatësisht rreth 5 mijë dhe 350 mijë fletë dokumente. Mes tyre gjendeshin urdhëresa, fermanë, të dhëna biografike të Ismail Qemalit, si edhe dokumentacion mbi Ali Pashën, një pjesë e të cilit i është dhuruar organit të kujtesës lokale, Muzeut të Tepelenës. Kjo bazë e gjerë kërkimore do të shërbejë si shtysë për kryerjen e hulumtimeve të mëtejshme, që hedhin dritë mbi veprimtarinë tërësore të Shqipërisë dhe të shqiptarëve gjatë periudhës osmane deri në shpalljen e Pavarësisë”, njofton DPA.

Kryeministri Rama e ka konsideruar një lajm të bukur ardhjen në Shqipëri të dokumentave nga arkivat perandorake të Stambollit.

“Mirëmëngjesi dhe me lajmin e bukur të ardhjes përgjithmonë në vendin tonë, të të gjitha dokumenteve mbi Shqipërinë dhe shqiptarët nga arkivat perandorake të Stambollit, ju uroj një ditë të mbarë”, shkruan Rama në rrjetin social Facebook.