Del në ankand pulovra e Lady Diana me delen e zezë

Lady Diana mbahet mend në mbarë botën për stilin e saj unik dhe emblematik. Tani, një nga artikujt e saj ikonik do të dalë në ankand në Sotheby’s gjatë eventit “Fashion Icons”, të planifikuar për shtatorin e ardhshëm në Nju Jork gjatë javës së modës.

Është pulovra e famshme me delen e zezë që Diana tregoi për herë të parë në qershor të vitit 1981, teksa ndiqte një ndeshje polo të bashkëshortit të saj të ardhshëm Charles. E zbuluar rastësisht në një magazinë pas rreth 40 vitesh, pulovra e Lady Dianës është dizajnuar nga marka britanike Warm & Wonderful dhe vlerësohet në një vlerë mes 50 mijë e 80 mijë dollarë.

Krijuar në vitin 1979, pulovra kaq e dashur nga Lady Diana pësoi një grisje të vogël në krah kyçeve dhe dy stilistet angleze u thirrën nga Buckingham Palace për ta zëvendësuar atë. Diana u kujdes shumë për atë pulovër. Për vite me radhë askush nuk e vuri re zëvendësimin, por në vitin 2020 ekspertja mbretërore e modës Elizabeth Holmes deklaroi se në disa foto fytyrat e deleve të zeza, në qendër të tufës së bardhë, dukeshin majtas, ndërsa në të tjera djathtas. Diana e veshi përsëri në 1983, përsëri në një ndeshje polo. Një dele e zezë brenda familjes mbretërore? Nuk dihet nëse ky është mesazhi që Diana dëshironte të dërgonte, por pulovra e kuqe do të mbetet gjithmonë simboli i stilit të saj rebel dhe të dashur në të gjithë botën.

Warm & Wonderful ndaloi prodhimin e modelit në vitin 1994. Megjithatë, në vitin 2020, marka Rowing Blazers nxori një kopje në shitje për 430 euro, në bashkëpunim me dy stilistët origjinalë Osborne dhe Muir. Gjithashtu, një kopje e puloverës ruhet në Muzeun Victoria dhe Albert në Londër.