Australia shpalos planin për ndalimin e rrjeteve sociale për fëmijët

Kryeministri australian Anthony Albanese shpalosi para parlamentit planin për të ndaluar fëmijët dhe adoleshentët deri 16 vjeç, të përdorin rrjetet sociale.

Albanese sqaroi se efektshmërinë e këtij ligji e garanton verifikimi i moshës përmes të dhënave biometrike të cilat do të verifikohen drejtpërdrejt nga autoritetet shtetërore.

“T’u rikthejmë fëmijëve, fëmijërinë e tyre, t’u japim prindërve paqen mendore. Ta miratojmë këtë ligj për të cilin do të jemi shumë krenarë”.

Agjencia e lajmeve Reuters sjell megjithatë, shembullin e një të riu australian, i cili është kundër këtij projektligji.

Ai është 17-vjeçari Leonardo Puglisi, themelues i medias së famshme informative online “6 Neës”. Ai e hapi këtë media fillimisht në Youtube, kur ishte vetëm 11 vjeç.

Gjatë këtyre viteve, gazetarët adoleshentë të këtij kanali kanë intervistuar shumë personalitete, përfshirë edhe Kryeministrin aktual kur ishte në opozitë.

“Shumë fëmijë nuk e kanë futbollin si pasion kryesor dhe mund të kenë nevojë për mediat sociale për të zbuluar çfarë duan të bëjnë. Le ta bëjnë në mënyrë të sigurtë, por ndalimi i plotë nuk e lejon këtë”.