Anulim i zgjedhjeve në Rumani, mijëra protestues kundër heqjes së fitores së kandidatit pro-rus

10/01/2025

Mijëra mbështetës të kandidatit të krahut të djathtë, Călin Georgescu, protestuan në rrugët e Rumanisë kundër anulimit të zgjedhjeve presidenciale në vend.

Rumania po përballet me trazira zgjedhore pasi raundi i parë i zgjedhjeve u anulua për shkak të raporteve mbi ndërhyrje ruse. Protestuesit, të grumbulluar jashtë Gjykatës Kushtetuese në Bukuresht, kërkojnë gjithashtu dorëheqjen e presidentit aktual Klaus Iohannis, sipas raportimeve nga mediat rumune.

Georgescu, një kandidat pro-rus, fitoi raundin e parë të zgjedhjeve presidenciale në fund të nëntorit, por Gjykata Kushtetuese shpalli rezultatin të pavlefshëm në fillim të dhjetorit, duke kërkuar zgjedhje të reja për shkak të parregullsive gjatë procesit zgjedhor. Gjykata konstatoi se votuesit ishin manipuluar përmes një trajtimi të paligjshëm preferencial të një kandidati në mediat sociale.

Zgjedhjet e reja janë të planifikuara për më 4 maj, me një balotazh të mundshëm më 18 maj. Georgescu ka përdorur kryesisht platformën e TikTok për fushatën e tij, ndërsa qeveria rumune ka ankuar se TikTok nuk e ka etiketuar atë si politikan dhe postimet e tij si reklama zgjedhore. Prokuroria publike tani është duke kryer hetime në lidhje me këtë çështje.

Georgescu gjithashtu ka paraqitur një ankesë në Gjykatën Evropiane të të Drejtave të Njeriut në Strasburg për anulimin e zgjedhjeve, ndërsa përpjekjet për të ndjekur rrugën ligjore në Rumanisë kanë rezultuar të pasuksesshme, megjithatë, një apel në Gjykatën e Lartë mbetet një mundësi e hapur.

Written by: Sasha Ndreka