Ekspertët paralajmërojnë krijuesit e inteligjencës artificiale se duhet të studiojnë vetëdijen

Një letër e hapur e nënshkruar nga disa akademikë nga e gjithë bota iu bën thirrje zhvilluesve të inteligjencës artificiale të mësojnë më shumë rreth vetëdijes, derisa sistemet e AI-s bëhen më të avancuara. “Nuk është më në fushën e fantashkencës të imagjinosh që sistemet e Inteligjencës Artificiale të kenë ndjenja dhe madje edhe vetëdije të nivelit njerëzor”, thuhet në letër.

Shumica e ekspertëve e pranojnë se inteligjenca artificiale nuk është aspak afër këtij niveli të sofistikimit. Por teknologjia po evoluon me shpejtësi dhe disa thonë se zhvillimet duhet të ndërpriten. Termi AI mbulon sistemet kompjuterike të afta për të kryer detyra që normalisht do të kishin nevojë për inteligjencë njerëzore. Kjo përfshin chatbot të aftë për të kuptuar pyetjet dhe për t’u përgjigjur me përgjigje të ngjashme me njeriun dhe sisteme të afta për të njohur objektet në foto.

“Generative Pre-trained Transformer 4” (GPT-4), një sistem AI i zhvilluar nga OpenAI, kompania prapa chatbotit ChatGPT, tani mund të përfundojë me sukses provimin e jurisprudencës, kualifikimin profesional për avokatët, megjithëse ende bën gabime dhe mund të ndajë dezinformata. Por ky është vetëm një funksion i AI-s. Produktet e AI-s janë duke u implementuar në shumë sektorë, duke përfshirë kërkimin shëndetësor, marketingun dhe financat.

Miliarderi i teknologjisë, Elon Musk, nënshkroi një letër bashkë me disa figura të tjera, duke thënë se zhvillimet e mëtejshme të inteligjencës artificiale duhet të pezullohen derisa të mund të hartohen dhe zbatohen masat efektive të sigurisë. Shoqata për Shkencën e Vetëdijes Matematikore (AMCS), e cila ka përpiluar letrën e hapur, të titulluar “Zhvillimi i përgjegjshëm i axhendës së AI-s duhet të përfshijë studimin e vetësijes”, tha se nuk kishte një pikëpamje nëse zhvillimi i AI-s në përgjithësi duhet të ndërpritet.

Por shoqata shtyu për një kuptim më të madh shkencor të vetëdijes, se si mund të zbatohej për AI dhe se si shoqëria mund të jetonte së bashku me të. “Zhvillimi i shpejtë i AI-s po ekspozon nevojën urgjente për të përshpejtuar kërkimet në fushën e shkencës së vetëdijes”, thuhet në letër. Këtë letër e nënshkroi Dr.Susan Schneider, e cila drejtoi agjencinë hapësinore amerikane NASA-n, si dhe akademikë nga universitete në Mbretërinë e Bashkuar, SHBA dhe Evropë. Vitin e kaluar, një inxhinier i Google u pushua nga puna pasi pretendoi se një sistem AI kishte zhvilluar ndjenja.