“Dyson Zone” kufjet që pastrojnë ajrin,vijnë së shpejti!

“Dyson” ka publikuar  detaje shtesë për kufjet e pastrimit të ajrit Dyson Zone.

Në një ueb-faqe të re të dedikuar për kufjet të cilat nuk janë publikuar  ende, “Dyson” ka prezantuar edhe specifikat e plota, së bashku me datën e publikimit  dhe çmimin prej  949 dollarëve.

Kufjet “Dyson Zone” mbështesin lidhjen Bluetooth 5.0, kanë vrimën audio 3.5mm dhe portin USB-C për rimbushje.

Dyson pretendon se kufjet në fjalë mund të arrijnë deri në 50 orë punë me një mbushje kur operojnë vetëm me audio, e cila reduktohet në maksimumin e 4 orëve kur kombinohet me pastrimin e ajrit dhe audion.

Këto kufje janë të pajisura me 11 mikrofona, tetë prej të cilëve përdoren nga sistemi i avancuar i anulimit të zhurmës (ANC) të pajisjes.

“Dyson” pretendon se këta mikrofona mund të monitorojnë tingujt përreth 384,000 herë në sekondë, duke reduktuar zhurmën e sfondit deri në 38dB.

Lidhur me filtrimin e ajrit, “Dyson” pretendon se një kombinim i filtrave elektrostatikë brenda “Dyson Zone” mund të kapë deri në 99 %  të ndotjes së grimcave (të vogla sa 0,1 mikron), dhe filtrat e karbonit synojnë gazrat që lidhen me ndotjen e qytetit, si dioksidi i azotit dhe squfuri dioksidit.