Zyrë e posaçme me prokurorë në KQZ, do të monitorojnë zgjedhjet e 11 Majit

SPAK dhe Prokuroria e Përgjithshme do të monitorojnë dhe hetojnë krimet zgjedhore jo vetëm nga zyrat e tyre dhe nga terreni përmes Task-Forcës Speciale, por dhe nga zyrat e Komisionit Qëndror të Zgjedhjeve.

Nga sot në këtë institucion do të ketë një zyrë të posaçme për përfaqësuesit e përcaktuar nga marrëveshja e nënshkruar pak javë më parë mes Dumanit, Çelës dhe Celibashit që do të koordinojnë nga KQZ gjithë punën dhe shkëmbejnë informacione gjatë fushatës dhe ditën e zgjedhjeve.

Marrëveshja parashikon krijimin e aksesit për përfaqësuesit e të dy prokurorive në ndërfaqen e Raportimit të Aktiviteteve Publike të KQZ-së, dhe platforma të tjera që monitorojnë dhe evidentojnë shkeljet e mundshme gjatë fushatës dhe administrimit të zgjedhjeve.