Trajneri serb: Shqipëria, kundërshtar serioz

Telashet nuk kanë fund te Serbia përpara ndeshjes me Shqipërinë. Trajneri Dragan Stojkoviç është detyruar të bëjë ndryshime në listë për shkak të dëmtimeve.

Lajmin e ka konfirmuar vetë numri një i stolit të Serbisë në konferencën për shtyp përpara mediave.

Ai e quajti sfidën kundër Shqipërisë më të rëndësishmen dhe bëri apel tek tifozët që të respektojnë rivalin.

“Për mua kjo është ndeshja më e rëndësishme, edhe pse nuk e konsiderojnë të tillë. Dua që ta mundim Shqipërinë në fushë, por kam një apel për tifozët që do të vijnë në stadium. Të sillen siç duhet që të mos rrezikojmë dënimin. Duhet të fokusohemi vetëm te futbolli.”

Stojkoviç bëri ironi me disa analistë që e kritikojnë, duke thënë se ata bëjnë tifo për Shqipërinë. Ai gjithashtu iu bëri apel edhe futbollistëve të tij që të festojnë më dinjitet në rast se do të fitojnë sfidën e 11 tetorit.