play_arrow

keyboard_arrow_right

Listeners:

Top listeners:

skip_previous play_arrow skip_next
00:00 00:00
playlist_play chevron_left
volume_up
chevron_left
  • cover play_arrow

    LIVE CLUB FM SHQIPËRI

  • cover play_arrow

    LIVE CLUB FM KOSOVË KOSOVË

  • cover play_arrow

    LIVE RADIO SHQIP DËGJO SHQIP

Sport

Skuadrat shqiptare në Europë/ Partizani deri në play off, Tirana e pafat në short

today04/01/2024

Background
share close

Aventura e klubeve shqiptare në Europë për vitin që lëmë pas mund të konsiderohet deri diku dinjitoze, por jo plotësisht e suksesshme.

Aventura e klubeve shqiptare në Europë për vitin që lëmë pas mund të konsiderohet deri diku dinjitoze, por jo plotësisht e suksesshme. Kjo pasi asnjë nga skuadrat pjesëmarrëse në kompeticionet kontinentale nuk arriti të kualifikohej në fazën e grupeve, edhe pse më pranë realizimit të këtij objektivi ishte Partizani, që, pas fitimit të titullit kampion, kishte ndarë rrugët me italianin Colella, duke marrë në drejtim Zoran Zekicin.

Partizani në kërkim të historisë! Publikohen formacionet për ndeshjen e 'Play Off' të Conference League – BoldNews.al

Kampionët e Shqipërisë e nisnin aventurën nga raundi i parë kualifikues i Champions League, ku përballë kishin Bate Borisovin, një skuadër jo në shkëlqimin e viteve të kaluara, dhe që siç tregoi ecuria e mëtejshme mund të kalohej, por të kuqtë nuk arritën të avanconin për më tej.

Në takimin e parë të luajtur në “Air Albania”, Partizani barazoi 1-1 me bjellorusët, në një ndeshje ku mund të kishte marrë më tepër, ndërsa në takimin e kthimit, që luhej në Hungari për shkak të situatës politike në Bjellorusi, skuadra e drejtuar nga Zekic u mund 2-0, duke u eliminuar që në raundin e paerë në Champions.

Gjithsesi, Partizani mund të vazhdonte aventurën europiane në Conference League, ku në raundin e dytë kishte si rivale një skuadër shumë më poshtë të kuqve, jo vetëm për sa i përket traditës, por edhe nivelit: Atletico Escaldes e Andorrës.

Të kuqtë u mjaftuan me një fitore 1-0 në transfertë, ku mund të kishin shënuar shumë më tepër, ndërsa në kthim triumfuan 4-1, për të vazhduar më tej në raundin e tretë me letonezët e Valmerias, një duel dyfish më i vështirë, por ku të kuqtë patën sukses, pasi fituan me përmbysje 1-2 takimin e parë në Letoni me gola të Carës dhe Rrapajt, ndërsa në kthim, në Tiranë, ishte sërish Cara që vulosi fitoren 1-0, duke e çuar Partizanin në play off-in e Conference League.

Pengesa që ndante të kuqtë nga një kualifikim historik në grupet e Conference League quhej Astana, skuadër kazake, që për fat të keq rezultoi e pakalueshme edhe pse mundësitë ishin të gjitha. Kazakët fituan 1-0 takimin e parë në shtëpinë e tyre, ndërsa në kthim u luajt një sfidë dramatike në “Elbasan Arena”.

Partizani kaloi në avantazh në pjesën e parë me Bintsouke, por kazakët barazuan në të dytën, duke e mbyllur ndeshjen në barazim 1-1, për të avancuar me rezultatin e përgjithshëm 2-1, me Partizanin që i mbeten pengjet e mossigurimit vetëm për pak të një arritjeje historike.

Tirana e pafat, shorti e përplas me gjigantët turq

Diskutim ndryshe ai i Tiranës. Nënkampione, që kishte humbur titullin vetëm në fund mes shumë polemikash, por që në Europë pati një short të pamëshirshëm, duke e vënë që në raundin e dytë të Conference League-s përballë gjigantëve turq të Beshiktashi.

Bardheblutë e nisnin rrugëtimin nga raundi i parë kualifikues në Conference League, përballë gjeorgjianëve të Dinamo Batumit, ndaj të cilëve barazuan 1-1 në frymën e fundit me një gol të Regi Lushkjas në Tiranë, për të bërë një paraqitje shumë të mirë në transfertën e kthimit, në Gjeorgji, ku fituan 2-1.

Tirana të ngjallte optimizëm për sa i përket potencialit në prag të fillimit të sezonit të ri. Gjithsesi, në raundin e dytë, përballë Beshiktashit, pavarësisht përpjekjeve maksimale të bardhebluve, Beshiktashi ishte i një tjetër dimensioni, duke i fituar të dyja sfidat, 3-1 në Turqi dhe 0-2 në Tiranë. Një eliminim i parathënë që me hedhjen e shortit, që këtë herë nuk kishte në preferencën e tij ngjyrat bardheblu, duke u vënë përballë Beshiktashin.

“Hirushja” e kampionatit shqiptar, eliminim dramatik 

Fituese e Kupës së Shqipërisë, pas një edicioni të jashtëzakonshëm, siguronte pjesëmarrjen historike për herë të parë në Kupat e Europës edhe Egnatia, surpriza e bukur e kampionatit, që niste aventurën kontinentale në raundin e dytë kualifikues të Conference League-s përballë armenëve të Araratit.

Skuadra rrogozhinase, protagoniste e një futbolli të bukur në arenën vendase, nuk mundi të tregojë më të mirën e saj në Europë. Në takimin e parë Egnatia barazoi 1-1 në transfertë, me një gol të “yllit” Dwamena, ndërsa sfida e kthimit ishte një skenar i denjë për filmat “thriller”, pasi u deshën plot 120 minuta lojë dhe llotaria e 11-metërshave për të përcaktuar skuadrën që avanconte për më tej.

90 minutat e kohës së rregullt përfunduan 2-2, me Egnatian dy herë në avantazh, por e barazuar dy herë nga rivalët. Në minutën e 108-të, i zakonshmi Dwamena kaloi sërish Egnatian para në shtesë, por Ararati u përgjigj me dy gola të shpejtë në të 110-n dhe të 113-n, për të përmbysur rezultatin në 4-3. Në frymën e fundit, në të 124′, Dwamena shënoi një gol dramatik, duke barazuar në 4-4, për të çuar gjithçka në lotarinë e 11-metërshave, ku Egnatia u penalizua ndoshta nga mungesa e përvojës, me Mustën dhe Zejnullain që gabuan nga pika e bardhë. Ararati kaloi 2-4 me penallti në një sfidë plot emocione, por që mbyllej me pengun se mund të ishte bërë më tepër nga Egnatia.

Vllaznia, zhgënjimi i madh në Europë

Në kupat e Europës merrte pjesë edhe Vllaznia, që zhgënjeu plotësisht, duke mos justifikuar pritshmëritë e publikut shkodran. Kuqeblutë kishin përballë një kundërshtar plotësisht të kalueshëm, irlandezo-veriorët e Linfield, që arritën të fitonin 3-1 sfidën e parë në Belfast.

Vllaznia, edhe pse fitoi 1-0 në kthim, u eliminua që në raundin e parë kualifikues të Conference League-s përballë një rivali që nuk kishte asgjë më tepër se Vllaznia. Ishte kjo panorama e verës së vitit 2023 për klubet shqiptare, që te Europa shohin edhe barometrin e vërtetë të forcës në përballjet me kundërshtarët kontinentalë, ku edhe në këtë verë, i kishin mundësitë për të bërë më tepër.

Egnatia dhe Partizani, miqësore luksi me Interin dhe Romën

Vera e viti 2023 do të mbahet mend edhe për miqësoret e luksit. Egnatia ishte protagoniste e një miqësoreje të madhe, kundër Interit, me skuadrën rrogozhinase që vuri në vështirësi serioze zikaltrit, nënkampionë të Europës, duke marrë e para kryesimin dhe madje duke rezistuar në barazim deri në minutën e 80-të.
Interi, gjithsesi në fund fitoi 4-2, por duke mbajtur shënim emrin Egnatia si një ekip i panjohur më parë, por që u hapi shumë punë e ia doli të trondiste në fushë një ndër skuadrat më të mira të Europës.

Partizani ndërkohë solli verën e kaluar në “Air Albania” Romën e Jose Mourinhos, që ruante nga ky stadium kujtime të bukura nga fitorja në finalen e Conference League. Në këtë takim festiv, të kuqtë luajtën me kokën lart dhe bënë një paraqitje dinjitoze, edhe pse u mundën 2-1 me gola të Belottit dhe El shaarawy-t, ndërsa për Partizanin shënonte golin e flamurit Tedi Cara nga pika e bardhë e 11-metërshit.

Një takim ky që, ashtu si dhe ai i Egnatias, përveçse si festë sportive, shërbeu për të rritur imazhin e futbollit shqiptar në arenën ndërkombëtare, me skuadrat shqiptare që u vunë përballë dy prej skuadrave që kanë bërë historinë e futbollit italian.

Written by: Sasha Ndreka

Rate it

Post comments (0)

Leave a reply

Your email address will not be published. Required fields are marked *