Presidenti Duka do të marrë pjesë në Kongresin e FIFA-s në Kanada

Federata Shqiptare e Futbollit do të marrë pjesë në një nga ngjarjet më të rëndësishme të futbollit botëror, Kongresin e 76-të të FIFA-s, i cili do të zhvillohet nesër, më 30 prill 2026 në Vancouver, Kanada.

Në këtë event me rëndësi të veçantë për vendimmarrjen globale të futbollit, FSHF do të përfaqësohet nga Presidenti Armand Duka.

Punimet do të zhvillohen në Vancouver Convention Centre, ku në fokus do të jenë çështje të rëndësishme për zhvillimin e futbollit në nivel global. Axhenda përfshin raportin vjetor të FIFA-s, analizën e aktiviteteve dhe pasqyrave financiare për vitin 2025, si dhe miratimin e buxheteve për ciklin 2027 deri në 2030.

Në vijim do të trajtohen edhe tema të tjera të rëndësishme, si zgjedhjet në strukturat e FIFA-s, propozimet e federatave anëtare dhe përditësimet mbi iniciativën globale kundër racizmit.

Pjesëmarrja e FSHF-së në këtë Kongres konfirmon angazhimin për të qenë pjesë aktive e proceseve vendimmarrëse ndërkombëtare, ndërsa futbolli shqiptar do të përfaqësohet në këtë forum të nivelit më të lartë nga Presidenti Armand Duka.