Përplasje masive nga tifozët e Romës, arrestohen 102 persona në Francë

Tifozët e Romës, u përfshinë në përplasje të ashpra në Nice të Francës mbrëmjen e së martës, ku kishin udhëtuar për ndeshjen e Europa League.

Sipas “L’Equipe”, policia ka arrestuar 102 persona të cilët ishin në posedim të armëve të ftohta. Ngjarjet kanë ndodhur në sheshin kryesor, ku raportohet se gjithçka nisi pas hedhjes së gotave nga disa tifozë drejt policisë, çka shkaktoi përleshje dhe ndjekje në rrugët e qytetit. Disa nga të ndaluarit ishin të maskuar për të mos u identifikuar.

Personat e arrestuar u shpërndanë në disa stacione policie dhe u vunë në dispozicion të prokurorisë së Nices. Përgjigja e shpejtë e forcave të rendit bëri të mundur që të parandalohej përhapja e incidenteve dhe dëmet në qytet.