Objektivi i Japonisë në Olimpiadë, kërkon të thyejë rekordin

Japonia ka si objektiv të vendosë një rekord të ri medaljesh në Lojërat Olimpike Dimërore Milano–Cortina 2026. Synimi është të tejkalohen 18 medaljet e fituara në Pekin katër vite më parë.

Njëkohësisht, drejtuesit e ekipit olimpik janë të vendosur që të përballen edhe me abuzimin online ndaj sportistëve të tyre. Deklarata u bë nga drejtuesi i ekipit olimpik të Japonisë, Hidehito Ito.

“Kemi marrë shumë informacione inkurajuese, ndaj mendoj se ka plot arsye për optimizëm. Ne besojmë se rezultatet e mira vijnë kur sportistët janë në gjendje të japin maksimumin e tyre. Nga ana jonë, duam të bëjmë gjithçka që mundemi për t’i mbështetur sportistët, në mënyrë që të fitojnë më shumë medalje dhe të tejkalojnë rekordin e arritur në Lojërat Dimërore të Pekinit”, tha Hidehito Ito.

Në Pekin, Japonia fitoi medalje në shtatë disiplina të ndryshme sportive, përfshirë tre medalje të arta. Në total, për eventin janë regjistruar 120 sportistë japonezë, si dhe 161 trajnerë dhe anëtarë stafi.

Ekipi japonez do të monitorojë gjithashtu nga afër rrjetet sociale për të bllokuar çdo formë abuzimi online ndaj sportistëve. Atletët japonezë kishin qenë objekt i një abuzimi të konsiderueshëm online gjatë Lojërave Olimpike Paris 2024.