Mazhoranca dhe opozita pro heqjes së imunitetit të Arben Ahmetajt

Mazhoranca dhe opozita janë pro heqjes së imunitetit të deputetit Arben Ahmetaj, për t’i hapur rrugë arrestimit që kërkon SPAK dhe kontrollit të banesës së tij.

Në mbledhjen e Këshillit të Mandateve, deputetët e mazhorancës deklaruan se janë dakord për t’i hequr imunitetin deputetit socialist Ahmetaj.

Edhe 5 deputetët e opozitës në këtë këshill dorëzuan raportin që i rekomandojnë seancës plenare të Kuvendit të Republikës së Shqipërisë të votojë për miratimin e dhënies së autorizimit, të kërkuar me kërkesën nr. 9431 Prot., datë 07.07.2023 të Prokurorisë së Posacme Kundër Korrupsionit dhe Krimit të Organizuar “Për dhënien e autorizimit për arrestimin/heqjen e lirisë, kontrollin personal dhe kontrollin e banesës së deputetit Arben Ahmetaj”.

Pas dhënies së pëlqimit nga Këshilli i Mandateve dhe Imunitetit në Kuvendin e Shqipërisë, relacionet do të kalojnë për votim në Parlament, ku deputetët do të duhet të ngrenë kartonat për të miratuar ose jo heqjen e imunitetit të deputetit Arben Ahmetaj.

Gazetarja e Klan News Klesiana Omeri bën të ditur se raporti i mazhorancës për heqjen e imunitetit të Ahmetajt do të dorëzohet në administratën e Kuvendit ditën e premte. Ndërsa të hënën në orën 17:00 pritet të mbahet seanca parlamentare ku do të votohet ky raport që do t’i hapë rrugë përfundimisht ose jo arrestimit të ish-zv/Kryeministrit.

Kurse opozita kërkoi që ky raport të kalojë për votim në seancë plenare ditën e nesërme.

Deputeti dhe kreu i grupit parlametar të Partisë Demokratike Gazment Bardhi bëri të ditur për mediat se Këshilli i Mandateve vendosi unanimisht se janë dakord për t’i hequr imunitetin deputetit socialist Arben Ahmetaj.

“Këshilli me votë unanime vendos t’i rekomandojë seancës plenare dhënien e autorizimit për arrestimin dhe kontrollin e banesës për deputetin Arben Ahmetaj”.

Por çështja ku u ndanë mazhoranca dhe opozita ishte koha kur do t’i përcillet Parlamentit për votim ky raport.

“Ajo në të cilën u ndamë ishte koha në të cilën do duhet seanca plenare të miratojë këtë kërkesë. Opozita depozitoi raportin e saj me shkrim. Kolegët e mazhorancës nuk bënë të njëjtën gjë duke i dhënë vetes kohë deri të premten për të dorëzuan raportin. Kërkesa jonë ishte që ky raport të dorëzohej ditën e nesërme ndërkohë që është vendosur në mënyrë arbritrare që kërkesa të zhvillohet të hënën. Çdo vonesë është në dëm të drejtësisë, është pengim i drejtësisë, çdo vonesë ndihmon personin e akuzuar”.