Kualifikimi i Dinamos dhe Egnatias, Duka: Arritje e rëndësishme për futbollin shqiptar

Presidenti i Federatës Shqiptare të Futbollit, Armand Duka, ka uruar Dinamon dhe Egnatian, për kualifikimin e tyre në turin e tretë të Conference League.

Në një postim në profilin e tij, Duka shkruan se kjo është një arritje e rëndësishme për futbollin shqiptar.

“Dinamo City dhe Egnatia shkruajnë një tjetër faqe suksesi për futbollin shqiptar në Europë! Urime dy klubeve tona për kualifikimin në turin e tretë të UEFA Conference League!

Dinamo City menaxhoi me qetësi një tjetër ndeshje të vështirë dhe siguroi kalimin e mëtejshëm, ndërsa Egnatia tregoi edhe një herë forcë dhe personalitet, duke fituar sërish ndaj Dinamo Minskut dhe duke bërë paraqitje mjaft të mira në këtë kompeticion.

Kjo është një arritje e rëndësishme për futbollin shqiptar, që rrit kredibilitetin e klubeve tona dhe forcon imazhin e kampionatit tonë. Uroj që ky rrugëtim të vazhdojë edhe më tej me suksese të tjera!

Ndërkohë, Vllaznia meriton gjithashtu respekt për paraqitjet e saj. E eliminuar vetëm në kohën shtesë, tregoi karakter dhe garoi me dinjitet. Koha për të reflektuar dhe për t’u përgatitur për sezonin e ri, me të njëjtin pasion dhe ambicie”, shkruan Duka.