Inter avancon në Botëror

Sfidon fluminense në 1/8-at, River Plate për rekord me tre kartona të kuq

Mekanizmat e Christian Chivu kanë nisur të funksionojnë te Interi.

Zikaltërit regjistruan fitoren e dytë nën drejtimin e rumunit, ecuri që e ndihmoi për të kaluar në turin tjetër të Kupës së Botës për klube.

Inter fitoi grupin ku së bashku me argjentinasin ishin pjesë edhe Monterrey që kaloi gjithashtu në raundin e radhës dhe sfidon Dortmundin. Francesco Pio Esposito (19 vjeç e 363 ditë) është golashënuesi më i ri i Interit në një garë ndërkombëtare që nga Marco Benassi në vitin 2013.

Nervozizmi ishte i dukshëm në krahun e River Plate, që mori kartonin e tretë të kuq në Kupën e Botës për klube 2025, rekord në këtë turne. Gjithsesi, ecuri e kënaqshme për italianët jo vetëm në aspektin sportiv, por edhe atë financiar. Me 2 fitore dhe 1 barazim, nënkampionët e Serie A kanë marrë 7 milionë euro si bonus nga FIFA, për ta dërguar në 31.5 milionë euro në total.

Shifër e akomuluar nga performanca në fushë dhe kualifikimi në 1/8-at, me fondet që do i shërbejnë Interit për tu përforcuar për sezonin e ri.