Goditi tifozin, trajneri në Angli ndëshkohet me karton të kuq 1 min lexim – Publikuar 17:31, 1 Tetor

Një episod i pazakontë ndodhi në ndeshjen mes Sheffield United dhe Southampton, e luajtur mbrëmjen e 30 shtatorit. Në pushimin e pjesës së parë, trajneri i vendasve, Chris Wilder, u ndëshkua me karton të kuq pasi goditi pa dashje një tifoz të skuadrës së tij me topin.

Sheffield kaloi në avantazh në minutën e 28-të me golin e Tyrese Campbell dhe shkoi në dhomat e zhveshjes në epërsi. Megjithatë, Wilder shfaqi pakënaqësi për mungesën e konkretizimit të rasteve të shumta që pati ekipi. Teksa shkonte drejt tunelit, ai gjuajti topin drejt tribunave, por përfundoi duke goditur një tifoz.

Si pasojë, Wilder u detyrua ta ndjekë pjesën e dytë nga shkallët e stadiumit. Ky ishte debutimi i tij në pankinën e Sheffield United përpara tifozëve vendas. Situata e klubit mbetet e vështirë, pasi renditet në vendin e fundit në Championship me një fitore dhe shtatë humbje në tetë ndeshjet e para.