“Fadil Vokrri”, fortesë e Kosovës

Të gjithë sytë e shqiptarëve do të jenë fokusuar mbrëmjen e sotme në Prishtinë, aty ku luhet historia. Kosova pret në ndeshjen më të rëndësishme Turqinë, për biletën drejt Kupës së Botës 2026. Një mision që është më pranë se kurrë për kombëtaren e Franko Fodës, ku një faktor kryesor, përveçse tifozëve, pritet ta luajnë edhe statistikat.

Kosova kthehet të luajë në “Fadil Vokrri” pas tre muajsh, ku ndeshja e fundit ishte ajo ndaj Zvicrës me rezultat 1-1. Dardanët në shtëpi kanë arritur rezultate mjaft të mira, ku në tetë ndeshjet e fundit kanë gjashtë fitore dhe dy barazime.

Rruga drejt Kupës së Botës solli tre ndeshje në “Fadil Vokrri”, ku zbarkuan Suedia, Sllovenia dhe Zvicra, me fitoren më të madhe që u regjistrua ndaj skandinavëve me rezultat 2-0, ndërsa edhe barazime kundër Sllovenisë dhe Zvicrës.