Dëborë dhe temperatura të ulëta, Juventusi me probleme në Champions

Juventusi do të luajë në transfertë në Champions League ndaj norvegjezëve të Bodo/Glimt. Ndeshja për italianët pritet të zhvillohet në kushte të vështira atmosferike.

Sipas parashikimeve, ndeshja e së martës rrezikon të shoqërohet me reshje të dendura dëbore, të cilat mund të ndikojnë në zhvillimin normal të sfidës. Gjatë orëve të ndeshjes parashikohen 5 deri në 10 centimetra dëborë, ndërsa temperaturat do të luhaten mes -1 dhe +1 gradë.

Përveç motit, sfidë paraqet edhe fusha sintetike, e cila në kombinim me dëborën krijon rrezik shtesë për ndërprerje të ndeshjes. Në rast të grumbullimit të tepërt të dëborës, arbitri mund të detyrohet të ndalojë përkohësisht lojën për pastrimin e vijave.

Edhe trajneri i Bodo/Glimt, Kjetil Knutsen, është shprehur se shpreson që ndeshja të zhvillohet normalisht, duke theksuar se situata varet nga kushtet atmosferike.