Belgjika nxiton të sigurojë mbrojtje kundër dronëve, pas ndërprerjes së fluturimeve

Qeveria belge po përpiqet urgjentisht të sigurojë sisteme mbrojtjeje kundër dronëve, pasi u detyrua të bëjë mbylljen e përkohshme të aeroportit Zaventem, pranë Brukselit.

Fluturimet u pezulluan të enjten në mbrëmje dhe dronë u panë edhe pranë një baze ushtarake.
Ministri i Mbrojtjes, Theo Francken, tha se kërcënimi tashmë prek edhe infrastrukturën civile, në disa vende evropiane.

Rreth 3,000 pasagjerë të Brussels Airlines u prekën dhe kompania pësoi humbje të mëdha financiare. Sipas përfaqësueses Joelle Neeb, kompania po ofron rimbursime dhe akomodim për pasagjerët.

Ajo tha se dronët janë një “kërcënim i ri” dhe kërkojnë plane të reja emergjence. Ngjarje të ngjashme me dronë janë raportuar kohët e fundit në Suedi, Norvegji dhe Danimarkë. Disa vende fajësojnë Rusinë për “luftë hibride”, por Kremlini i ka mohuar akuzat.

Gjermania sugjeron se incidentet mund të lidhen me planin e BE-së për përdorimin e aseteve të ngrira ruse për Ukrainën. Autoritetet belge gjithashtu dyshojnë për përfshirje ruse, por pa prova konkrete.
Analistët thonë se Moska mund të synojë testimin e mbrojtjes evropiane.