Bayern, 66 gola në kampionat

Bayern Munchen është skuadra që ka dominuar futbollin gjerman në dekadat e fundit, por këtë sezon po vendos rekorde të tjerë. Në 17 ndeshjet e fazës së parë lojtarët bavarezë shënuan 66 gola, numri më i lartë prej 95 vitesh në kampionatet elitarë në kontinent. Në po aq takime në vitin 1930 Athletic Bilbao realizoi 72 gola, ndërsa Blackburn 73 në pjesën e parë të sezonit 1889-1890.

Nën drejtimin e Vincent Kompany, skuadra mori 47 nga 51 të mundshmet, aq sa grumbulloi ekipi në pjesën e parë të sezonit 2013-2014 kur trajner ishte Pep Guardiola. Me këtë ecuri Bayern pritet ta sigurojë titullin kampion disa javë para fundit të sezonit, ndërsa diferenca me ndjekësin më të afërt Borussia Dortmund është 11 pikë.