Bam Adebayo në historinë e koshit

Mbrëmje historike në NBA, kur Bam Adebayo realizoi plot 83 pikë dhe udhëhoqi Miami Heat drejt fitores 150-129 ndaj Washington Wizards. 28-vjeçari i Miamit regjistroi totalin e dytë më të lartë të pikëve në një ndeshje të vetme në historinë e kampionatit, duke kaluar performancën legjendare prej 81 pikësh të Kobe Bryant në vitin 2006. Rekordi absolut në NBA vazhdon të mbahet nga Wilt Chamberlain, i cili realizoi 100 pikë në vitin 1962.

Adebayo ishte i pandalshëm që në fillim të ndeshjes, duke shënuar 31 pikë vetëm në çerekun e parë dhe duke vendosur disa rekorde për ekipin e Miamit, përfshirë pikët më të shumta në një ndeshje, në një çerek dhe në një pjesë loje. Rekordi i mëparshëm i klubit ishte 61 pikë, i vendosur nga LeBron James në vitin 2014. Ndërkohë, rekordi personal i Adebayos deri më tani kishte qenë 41 pikë kundër Brooklyn Nets në janar të vitit 2021.

Në 42 minuta lojë, Adebayo kompletoi shtatë trepikësha dhe plot 36 gjuajtje të lira nga 43 tentativa, duke shtuar edhe nëntë ribaunde. Ai vendosi gjithashtu rekorde të reja në NBA për gjuajtjet e lira të realizuara dhe të tentativa në një ndeshje të vetme. Rekordi i mëparshëm për gjuajtjet e lira të realizuara mbahej nga Wilt Chamberlain dhe Adrian Dantley me nga 28, ndërsa rekordin për tentativat e mbante Dwight Howard me 39.

Performanca spektakolare erdhi në një moment të vështirë për Miamin, pasi skuadra kishte disa mungesa të rëndësishme për shkak të dëmtimeve. Falë kësaj fitoreje, Miami regjistroi suksesin e gjashtë radhazi, duke barazuar serinë më të gjatë të fitoreve këtë sezon dhe duke përmirësuar bilancin në 22 fitore dhe 11 humbje në shtëpi. Nga ana tjetër, Washington pësoi humbjen e nëntë radhazi.