Atalanta katastrofike në Europë

Humbja e rëndë 6-1 e Atalantës kundër Bayern Munich në ndeshjen e parë të raundit të 1/8-ave të UEFA Champions League mund të ketë vulosur praktikisht shanset e Italisë për të pasur një ekip të pestë në kompeticionin më të madh evropian për klube sezonin e ardhshëm. Pas këtij rezultati, diferenca në renditjen e koeficientëve të UEFA-s mes Serie A dhe Bundesligës është rritur ndjeshëm.

Ndërkohë që Anglia ka siguruar matematikisht vendin e parë dhe një ekip shtesë në Champions League, Italia sheh distancën me Gjermaninë, vendi i dytë në këtë garë, të dyfishohet, duke kaluar nga 214 pikë në rreth 500. Situata mund të përkeqësohet edhe më shumë nëse ekipet italiane që vazhdojnë garën në kompeticionet e tjera evropiane, si Roma, Bologna dhe Fiorentina, nuk arrijnë të shkojnë deri në finale në UEFA Europa League dhe UEFA Europa Conference League.

Aktualisht renditja e koeficientëve kryesohet nga Anglia me 22.402 pikë, ndërsa pas saj vijnë Gjermania, Spanja dhe Italia, të ndara me diferenca shumë të vogla. Megjithatë, klubet gjermane dhe spanjolle pritet të rrisin më shumë pikët deri në fund të sezonit, duke e bërë gjithnjë e më të vështirë për Italinë të rikuperojë. Në këto kushte, vendi i katërt në Serie A pritet të mbetet pozicioni i fundit që siguron kualifikimin për Champions League sezonin e ardhshëm.

Disfata e Atalantës nxori në pah edhe hendekun mes futbollit italian dhe klubeve më të mëdha të Evropës. Skuadra nga Bergamo ishte e vetmja përfaqësuese e Serie A që arriti deri në këtë raund të Champions League. Me humbjen në shtëpi, Atalanta hyn në historinë negative të futbollit italian në Europë. Rezultati 6-1 i pësuar në Bergamo është rezultati i katërt më i keq i një klubi italian në kompeticionet evropiane. Një rezultat i tillë ishte regjistruar edhe nga Roma kundër Bayern Munich në sezonin 2015/16. Më keq se kaq mbeten vetëm dy humbjet 7-1 të Romës, njëra ndaj gjermanëve dhe tjetra ndaj Manchester United, si dhe disfata historike 7-0 që Juventus pësoi nga Wiener Sport-Club në sezonin 1958/59.