11 Maji, regjistrohen 246 mijë emigrantë

Komisioni Qëndror i Zgjedhjeve deklaroi sot mbylljen e procesit të regjistrimit të emigrantëve që kanë shprehur dëshirën për të votuar në 11 Maj.

Në përfundim të shqyrtimit të mbi 294 mijë kërkesave u miratuan vetëm gati 246 mijë aplikime nga 110 vende të votës.

Mbi 37% e emigrantëve të regjistruar në zgjedhje janë nga Italia me mbi 91 mijë persona. Më pas vjen Greqia me rreth 68 mijë e ndjekur nga Gjermania, Shtetet e Bashkuara të Amerikës dhe Mbretëria e Bashkuar që kanë edhe numrin më të madh të votuesve.

Sa u takon qarqeve që ata u përkasin numrin më të madh e ka Tirana me mbi 52 mijë votues ose 21.3% e tyre.

Më pas vjen Fieri i ndjekur nga Elbasani, Durrësi, Korça, Vlora, Shkodra, Berati, Lezha, Dibra, Gjirokastra dhe Kukësi.

58.3% e kërkesave kanë qenë meshkuj, ndërsa 41.7% femra. Nga data 8 deri në 16 Prill, emigrantët e regjistruar do të kenë në shtëpi zarfin me fletën e votimit të cilën do ta kthejnë mbrapsht të plotësuar pa asnjë pagesë.