Robert De Niro në filmin për luftën e Kosovës, do të luajë rolin e babait të producentit Fitim Krasniqi

Një film ndërkombëtar që do të trajtojë luftën e Kosovës pritet të bashkojë disa nga emrat më të njohur të Hollywood-it, mes tyre edhe legjendën e kinemasë Robert De Niro.

Lajmin e ka bërë të ditur producenti kosovar Fitim Krasniqi, i cili ka konfirmuar se De Niro do të luajë rolin e babait të tij, në një histori të bazuar mbi ngjarje të vërteta që lidhen me masakrën e Reçakut dhe zhvillimet e luftës nga fillimi deri në fund.

“Është historia e babait tim dhe e luftës që ka ndodhur në Kosovë. Babai im u plagos dhe më pas u dogj për së gjalli. Ky film është një homazh për të dhe për të gjithë ata që u flijuan”, ka rrëfyer Krasniqi në një intervistë me gazetarin Blendi Fevziu.

Producenti tha se në projekt do të përfshihen 71 aktorë nga Hollywood-i, me kontrata tashmë të nënshkruara, ndërsa xhirimet do të nisin vitin e ardhshëm, pasi janë shtyrë për arsye organizative.

Filmi pritet të jetë një dramë me mesazh të fuqishëm njerëzor, që synon të sjellë në ekran tragjedinë dhe qëndresën e popullit të Kosovës përmes një rrëfimi personal, por me jehonë universale.