Propozimi i ri BE-SHBA nuk përfshin uljen e tarifës 50% për çelikun

Propozimi më i fundit për një marrëveshje tregtare mes Bashkimit Evropian dhe Shteteve të Bashkuara nuk përfshin heqjen apo uljen e tarifës ndëshkuese 50% që presidenti Donald Trump vendosi mbi importet e çelikut, duke shkaktuar shqetësim të thellë në industrinë evropiane.

Kjo përbën një pengesë të madhe për prodhuesit e çelikut në BE, të cilët muajin e kaluar paralajmëruan se tarifa, e kombinuar me kostot e larta të energjisë dhe konkurrencën e pandershme nga Kina, rrezikon t’i çojë drejt falimentimit.

Një diplomat nga Brukseli konfirmoi se marrëveshja e përkohshme për të shmangur një luftë tregtare me SHBA-në, e cila iu paraqit shteteve anëtare të mërkurën përfshin një tarifë bazë prej 15% për një sërë produktesh, por me përjashtime të dukshme si çeliku, i cili mbetet me tarifën 50%. Burime të tjera pohojnë se BE-ja po kërkon një kompromis që do ta lejonte këtë tarifë vetëm për sasinë e çelikut që kalon një kuotë të caktuar.

Megjithatë, diplomatët theksuan se përjashtimet dhe reduktimet e tarifave në të dy drejtimet nuk janë përfundimtare. Nëse tarifa 50% për çelikun mbetet në marrëveshjen përfundimtare, kjo do të thotë se BE-ja do të përballet me një tarifë më të lartë se ajo që paguan Mbretëria e Bashkuar.

Çeliku britanik i nënshtrohet aktualisht një tarife 25%, dhe nuk ka indikacione se kjo do të rritet. Përkundrazi, sipas marrëveshjes së arritur nga kryeministri britanik Keir Starmer në maj, tarifa pritet të shfuqizohet plotësisht. Megjithatë, zbatimi i plotë i marrëveshjes është vonuar për shkak të negociatave mbi origjinën e disa materialeve. Ndërkohë, tarifa bazë 15% që do të zbatohet për eksportet evropiane drejt SHBA-së është gjithashtu më e lartë se ajo prej 10% që është rënë dakord për Britaninë.

Në samitin e mbajtur të enjten në Pekin, presidenti kinez Xi Jinping u bëri thirrje liderëve evropianë që të “marrin vendime strategjike të drejta” përballë përplasjes tregtare. “Sfidat me të cilat përballet Evropa sot nuk vijnë nga Kina,” tha Xi. “Nuk ekzistojnë konflikte të thella interesi apo kontradikta gjeopolitike mes Kinës dhe BE-së.”

Presidentja e Komisionit Evropian, Ursula von der Leyen, tha në të njëjtin event se BE-së do t’i jetë “shumë e vështirë të ruajë nivelin aktual të hapjes tregtare” me Kinën, nëse kjo e fundit vazhdon të ketë suficit të madh tregtar, të nxitur nga “shtrembërime tregtare” si subvencionet shtetërore.

Ajo theksoi se BE-ja përbën 14.5% të eksporteve kineze, përfshirë çelikun, ndërsa Kina merr vetëm 8% të eksporteve të BE-së. “Këto shifra dëshmojnë për madhësinë e marrëdhënies sonë, por edhe për një pabarazi në rritje,” tha von der Leyen.

Megjithëse nuk u arrit ndonjë marrëveshje formale, duket se BE-ja dhe Kina kanë bërë përparim për zhbllokimin e furnizimit me elementët e rrallë, mungesa e të cilëve po pengon prodhimin e makinave.

Shoqata gjermane e industrisë së makinave, VDA, paralajmëroi se “ndalesat në prodhim nuk mund të përjashtohen më” për shkak të mungesës së mineraleve, përfshirë magnetët e nevojshëm për hapjen dhe mbylljen automatike të dritareve, bagazheve dhe kofanëve të makinave. “Kufizimet kineze të eksportit për elementët e rrallë janë një sfidë serioze për sigurinë e furnizimit,” deklaroi presidentja e VDA-së, Hildegard Müller.

Von der Leyen u tha gazetarëve se në samit u gjet një “zgjidhje praktike”, ku kompanitë automobilistike dhe të tjera mund t’i drejtohen menjëherë Komisionit për ndërmjetësim dhe për të zbuluar arsyet e vonesave në furnizim.

Nën presionin e SHBA-së dhe Kinës, liderët evropianë po e konsiderojnë një marrëveshje të shpejtë me Uashingtonin edhe nëse kjo përfshin tarifa të rënda si një çmim që ia vlen për të siguruar stabilitet për bizneset.

Shoqata evropiane e industrisë së çelikut, Eurofer, paralajmëroi këtë muaj se tarifa 50% do të ishte katastrofike. Burime diplomatike bëjnë të ditur se kancelari gjerman, Friedrich Merz, mbetet i vendosur për të mbyllur një marrëveshje sa më shpejt, në mënyrë që të krijohet stabilitet për investitorët dhe prodhuesit, veçanërisht në sektorin e automobilave.

“Ndërkohë që po humbasim tregun tonë kryesor të eksportit, tregu evropian po përmbytet nga çeliku që SHBA nuk po e përthith më,” deklaroi Eurofer, pas dështimit të përpjekjes së parë për një marrëveshje, e cila u rrëzua nga Trump dhjetë ditë më parë.

Mediat raportojnë se Merz, i cili ka një kanal të drejtpërdrejtë komunikimi me presidentin amerikan, mund të kontaktojë me të gjatë vizitës së planifikuar në fundjavë në Skoci, ku do të vizitojë dy fushat e golfit të Trump.

Ndërkohë, Banka Qendrore Evropiane vendosi të enjten të mbajë të pandryshuara normat e interesit, teksa pret të kuptojë ndikimin që mund të kenë tarifat e SHBA-së në ekonominë e eurozonës.