Zyrtare/ Gattuso largohet nga drejtimi i Italisë

Gennaro Gattuso nuk është më trajner i Italisë, ndërsa ka ardhur edhe zyrtarizimi. Tekniku dhe Federata Italiane, kanë ndërprerë kontratën mes tyre.

Vendimi vjen menjëherë pas humbjes së Italisë ndaj Bosnjës, që i la ata jashtë Botërorit për të tretën herë radhazi.

Gattuso qëndroi në krye të Italisë për nëntë muaj, periudhë gjatë së cilës nuk arriti objektivin e kualifikimit. Përmes një komunikate zyrtare, FIGC falënderoi teknikun për punën e bërë, ndërsa vetë Gattuso u shpreh se largimi i tij vjen për të lehtësuar vlerësimet e reja teknike të federatës.

Emrat e përfolur për të marrë drejtimin e skuadrës janë Roberto Mancini, Massimiliano Allegri, Simone Inzaghi dhe Antonio Conte, por vendimi përfundimtar do të merret pas 22 qershorit, datë kur do të zgjidhet presidenti i ri i FIGC.

Ndërkohë, trajneri i U21, Baldini, mund të udhëheqë ekipin në miqësoret e verës ndaj Luksemburgut dhe Greqisë.