Gjermania krijon repartin e parë të dronëve: Njësi prej 600 ushtarakësh nis punën në 2027

Gjermania po përgatitet të krijojë regjimentin e parë ushtarak të dedikuar posaçërisht për përdorimin e dronëve, një njësi e re që pritet të bëhet pjesë e Bundeswehr-it në vitin 2027.

Ministri gjerman i Mbrojtjes, Boris Pistorius, ka prezantuar planin për ngritjen e kësaj strukture të specializuar, e cila sipas projektit do të përbëhet nga rreth 600 ushtarakë.

Regjimenti do të pajiset me një gamë të gjerë sistemesh pa pilot, përfshirë dronë me rreze të gjatë veprimi, sisteme tokësore pa pilot dhe dronë sulmues të njëpërdorimshëm, të projektuar për goditjen e drejtpërdrejtë të objektivave.

Sipas televizionit gjerman N-TV, disa prej sistemeve që do të përdoren nga njësia e re mund të kenë një rreze veprimi deri në 500 kilometra.

Struktura e re nuk do të fokusohet vetëm te përdorimi i dronëve. Sipas planit të prezantuar nga Pistorius, regjimenti do të ketë edhe një kompani të posaçme për luftën elektronike.

Kjo kompani do t’i sigurojë njësisë kapacitete shtesë për operacione elektronike, duke plotësuar përdorimin e sistemeve ajrore dhe tokësore pa pilot.

Regjimenti i ri do të vendoset në kuadër të Divizionit të 10-të të blinduar të Bundeswehr-it, një prej formacioneve kryesore të forcave të armatosura gjermane.

Në këtë divizion bën pjesë edhe brigada gjermane e dislokuar në Lituani, e cila është pjesë e angazhimit të Gjermanisë në forcimin e krahut lindor të NATO-s.

Krijimi i kësaj njësie shënon një hap të mëtejshëm të Bundeswehr-it drejt integrimit të sistemeve pa pilot, luftës elektronike dhe teknologjive të reja në strukturat e tij ushtarake.