Arabia Saudite pezullon punimet për “kubin” Mukaab-i, do të ishte qiellgërvishtësi më i madh në botë

Arabia Saudite ka pezulluar ndërtimin e planifikuar të një qiellgërvishtësi gjigant në formë kubeje, në qendër të një zhvillimi urban në Riad, ndërsa po rishikon financimin dhe fizibilitetin e projektit. Kështu raporton Reuters, duke iu referuar katër burimeve të njohura me çështjen.

Mukaab, në qendër të zhvillimit të ri New Murabba në Riad, është projekti më i fundit i lidhur me Vizionin për vitin 2030 të Arabisë Saudite që është kufizuar ose shtyrë, teksa fondi sovran prej 925 miliardë dollarësh i mbretërisë po zvogëlon ambiciet për të menaxhuar kostot dhe për të prioritetizuar shpenzimet.

Mbretëria po largohet nga shpenzimet e rënda për projekte futuristike që kanë dominuar vizionin e princit të kurorës Mohammed bin Salman, si NEOM’s The Line, drejt iniciativave të konsideruara më urgjente dhe potencialisht më fitimprurëse.

Projektet që janë në fokus tani përfshijnë infrastrukturën për World Expo 2030 dhe Kupën e Botës 2034, zonën kulturore të përzier Diriyah me vlerë 60 miliardë dollarë dhe megaprojektin turistik Qiddiya.

Ky ripozicionim reflekton gjithashtu presionet fiskale në rritje, pasi çmimet e naftës mbeten shumë poshtë niveleve të nevojshme për të financuar agjendën ambicioze të transformimit.

Punimet përtej gërmimit të tokës dhe themeleve janë pezulluar

Mukaab ishte planifikuar si një kub metalik 400 metra me 400 metra, që përmbante një kupolë me ekran të fuqizuar nga inteligjenca artificiale (më i madhi në planet) që vizitorët mund ta shikonin nga një strukturë e lartë mbi 300 metra.

“Kur hyn në Mukaab, hyn në një botë tjetër,” tha CEO Michael Dyke në një konferencë në Riad në dhjetor, duke pranuar vështirësitë për realizimin e projektit. “Të përpiqesh të zgjidhësh diçka që nuk ekziston sot, është mjaft sfiduese,” shtoi ai.

E ardhmja e këtij projekti tani është e paqartë, me punimet përtej gërmimit të tokës dhe themeleve të pezulluara. Zhvillimi i pasurive të paluajtshme përreth pritet të vazhdojë, sipas pesë personave të njohur me planet lidhur me projektin.

Galeria fotografike (

1 / 2

)