Neymar i jep lamtumirën Brazilit

Pas 16 vitesh, qindra emocione dhe një fanellë që u kthye në simbol të një brezi të tërë, Neymar Jr. ka mbyllur përfundimisht kapitullin me kombëtaren braziliane.

Ylli i futbollit ka konfirmuar largimin nga Seleçao, duke i dhënë fund një prej karrierave më të rëndësishme ndërkombëtare në historinë e Brazilit.

Në moshën 34-vjeçare, ai largohet nga kombëtarja si një prej figurave më të mëdha të futbollit brazilian, një lojtar që për më shumë se një dekadë mbajti mbi supe peshën e pritshmërive të miliona tifozëve.

Me fanellën e Seleçaos, Neymar ka shkruar histori. Ai është golashënuesi më i mirë i të gjitha kohërave i Brazilit me 79 gola në 128 paraqitje, duke kaluar rekordin e legjendës Pelé në vitin 2023.

Në karrierën e tij ndërkombëtare, Neymar ka marrë pjesë në tre edicione të Kupës së Botës, ka fituar medaljen e artë olimpike në Rio 2016, si dhe Kupën e Konfederatave në vitin 2013.

Ai është gjithashtu një nga lojtarët me më shumë paraqitje në historinë e kombëtares braziliane.

Megjithatë, në këtë histori të jashtëzakonshme mbetet një peng i madh: mungesa e trofeut më të rëndësishëm, Kupës së Botës. Pas eliminimit të Brazilit në Botërorin 2026, Neymar vendosi të mbyllë kapitullin me kombëtaren.

“Koha ime me kombëtaren ka përfunduar. Kam bërë histori, kam qenë shumë i lumtur, kam dhënë gjakun dhe jetën time për këtë fanellë. Gjithmonë kam luftuar për Brazilin, por tani nuk dua të vazhdoj më”, tha Neymar.

Pamja e fundit me fanellën e verdhë ishte një moment i mbushur me emocione. Në stadiumin MetLife në Nju Xhersi, pas eliminimit dramatik të Brazilit, Neymar mbeti për disa minuta në fushë me lot në sy.

Edhe pse arriti të shënonte nga pika e bardhë në minutat e fundit, goli nuk mjaftoi për të shmangur fundin e ëndrrës braziliane.

Karriera e tij me Seleçaon u shoqërua me momente të paharrueshme, por edhe me presionin e madh për të qenë pasuesi i yjeve historikë të Brazilit.

Nga Santos te Barcelona dhe Paris Saint-Germain, Neymar u shndërrua në një nga futbollistët më spektakolarë të brezit të tij.

I rikthyer te Santos, klubi ku nisi historia e tij si profesionist, sulmuesi brazilian do të përqendrohet tani te objektivat në nivel klubesh. Brazili tashmë duhet të nisë një epokë të re pa numrin e tij 10.

Neymar largohet nga Seleçao me rekorde, emocione dhe një trashëgimi që do të mbetet përgjithmonë në historinë e futbollit brazilian.